2 Samuel 18
1ⲇ︤ⲁ︦ⲇ︥ ⲇⲉ ⲁϥⲉⲣⲁⲛⲛⲱⲙⲉⲓ ⲏ ⲁϥϭⲉⲙⲡϣⲓⲛⲉ ⲙⲡⲗⲁⲟⲥ ⲉⲧⲛⲙⲙⲁϥ ⲁⲩⲱ ⲁϥⲕⲱ ⲉϩⲣⲁⲓ ⲉϫⲱⲟⲩ ⲛϩⲉⲛⲭⲓⲗⲓⲁⲣⲭⲟⲥ ⲙⲛ ϩⲉⲛϩⲉⲕⲁⲧⲟⲛⲧⲁⲣⲭⲟⲥ 2ⲁⲩⲱ ⲇ︤ⲁ︦ⲇ︥ ⲁϥⲥⲉⲣⲡⲗⲁⲟⲥ ⲉⲃⲟⲗ ϩⲓⲛⲁⲓ ⲡⲟⲩⲉⲛ ⲉϣⲟⲙⲛⲧ ⲙⲉⲛ ⲛⲧⲟⲟⲧϥ ⲛⲓⲱⲁⲃ ⲁⲩⲱ ⲡⲟⲩⲉⲛ ⲉϣⲟⲛⲙⲧ ⲛⲧⲟⲟⲧϥ ⲛⲁⲃⲉⲥⲥⲁ ⲡϣⲏⲣⲉ ⲛⲥⲁⲣⲟⲩⲉⲓⲁ ⲡⲥⲟⲛ ⲛⲓⲱⲁⲃ ⲁⲩⲱ ⲡⲕⲉⲟⲩⲉⲛ ⲉϣⲟⲙⲛⲧ ⲛⲧⲟⲟⲧϥ ⲛⲉⲑⲑⲓ ⲡⲅⲉⲑⲑⲁⲓⲟⲥ ⲁⲩⲱ ⲡⲉϫⲉⲇ︤ⲁ︦ⲇ︥ ⲛⲁⲩ ϫⲉ ϩⲛ ⲟⲩⲉⲓ ⲁⲛⲟⲕ ϯⲛⲁⲉⲓ ⲉⲃⲟⲗ ⲛⲙⲙⲏⲧⲛ 3ⲡⲉϫⲁⲩ ⲛⲁϥ ϫⲉ ⲛⲧⲉⲛⲛⲁⲕⲁⲁⲕ ⲁⲛ ⲉⲉⲓ ⲉⲃⲟⲗ ⲛⲙⲙⲁⲛ ϫⲉ ⲉⲛϣⲁⲛϭⲱⲧⲡ ⲁⲛⲟⲛ ⲛⲧⲛⲡⲱⲧ ⲛⲥⲉⲛⲁϯϩⲧⲏⲩ ⲉⲣⲟⲛ ⲁⲛ ⲁⲩⲱ ⲉⲣϣⲁⲛⲧⲉⲛⲡⲁϣⲉ ⲟⲛ ⲙⲟⲩ ϩⲙ ⲡⲉⲓⲕⲉ ⲟⲛ ⲛⲥⲉⲛⲁϯϩⲧⲏⲩ ⲉⲣⲟⲛ ⲁⲛ ϫⲉ ⲁⲛⲟⲛ ⲛⲁⲡⲗⲁⲟⲥ ⲉⲕⲛⲁⲣⲑⲉ ⲛⲧⲟⲕ ⲛⲟⲩⲧⲃⲁ ⲛⲣⲱⲙⲉ ⲛϩⲏⲧⲛ ⲧⲉⲛⲟⲩ ϭⲉ ⲟⲩⲁⲅⲁⲑⲟⲛ ⲛⲁⲛ ⲡⲉ ⲉⲧⲣⲉⲕϭⲱ ⲉⲡⲁϩⲟⲩ ϩⲛ ⲧⲡⲟⲗⲓⲥ ϫⲉ ⲛⲧⲟⲕ ⲕⲛⲁϣⲱⲡⲉ ⲛⲁⲛ ⲛⲛⲁϣⲧⲉ ⲉⲃⲟⲏⲑⲉⲓ ⲉⲣⲟⲛ 4ⲡⲉϫⲉⲡⲣⲣⲟ ⲇ︤ⲁ︦ⲇ︥ ⲛⲁⲩ ϫⲉ ⲡϩⲱⲃ ⲉⲧⲉⲣⲁⲛⲏⲧⲛ ϯⲛⲁⲁⲁϥ ⲡⲣⲣⲟ ⲇⲉ ⲁϥϭⲱ ϩⲓϫⲛ ⲧⲡⲩⲗⲏ ⲁⲩⲱ ⲡⲗⲁⲟⲥ ⲧⲏⲣϥ ⲁϥⲙⲟⲟϣⲉ ⲉⲃⲟⲗ ⲉⲩⲛⲁⲣϣⲉ ϣⲉ ⲁⲩⲱ ⲉⲩⲛⲁⲣϣⲟ ϣⲟ 5ⲡⲣⲣⲟ ⲇⲉ ⲁϥϩⲱⲛ ⲉⲧⲟⲟⲧϥ ⲛⲓⲱⲁⲃ ⲙⲛ ⲁⲃⲉⲥⲥⲁ ⲙⲛ ⲉⲑⲑⲓ ⲉϥϫⲱ ⲙⲙⲟⲥ ⲛⲁⲩ ϫⲉ ϩⲁⲣⲉϩ ⲉⲡⲁϣⲏⲣⲉ ⲁⲃⲉⲥⲥⲁⲗⲱⲙ ⲁⲩⲱ ⲡⲗⲁⲟⲥ ⲧⲏⲣϥ ⲁϥⲥⲱⲧⲙ ⲉⲡⲣⲣⲟ ⲉϥϩⲱⲛ ⲉⲧⲟⲟⲧⲟⲩ ⲛⲛⲁⲣⲭⲱⲛ ⲧⲏⲣⲟⲩ ⲉⲧⲃⲉ ⲁⲃⲉⲥⲥⲁⲗⲱⲙ 6ⲁⲩⲱ ⲡⲗⲁⲟⲥ ⲧⲏⲣϥ ⲁϥⲉⲓ ⲉⲃⲟⲗ ⲉⲡⲙⲁ ⲛϣⲏⲛ ⲟⲩⲃⲉ ⲡⲓ︤ⲏ︦ⲗ︥ ⲡⲡⲟⲗⲉⲙⲟⲥ ⲁϥϣⲱⲡⲉ ϩⲙ ⲡⲙⲁ ⲛϣⲏⲛ ϩⲙ ⲡⲕⲁϩ ⲛⲉⲫⲣⲁⲓⲙ 7ⲁⲩⲱ ⲡⲗⲁⲟⲥ ⲙⲡⲓ︤ⲏ︦ⲗ︥ ⲁϥϭⲱⲧⲡ ⲙⲡⲙⲁ ⲉⲧⲙⲙⲁⲩ ϩⲁⲑⲏ ⲛⲛⲉϩⲙϩⲁⲗ ⲛⲇⲁⲩⲉⲓⲇ ⲁⲩⲱ ⲧϭⲟⲡⲧⲥ ⲁⲥϣⲱⲡⲉ ⲉⲩⲛⲟϭ ⲧⲉ ϩⲙ ⲡⲉϩⲟⲟⲩ ⲉⲧⲙⲙⲁⲩ ⲁⲩϭⲱⲧⲡ ⲁⲩϩⲉ ⲛϭⲓ ⲧⲃⲁ ⲥⲛⲁⲩ ⲛⲣⲱⲙⲉ 8ⲁⲩⲱ ⲡⲡⲟⲗⲉⲙⲟⲥ ⲁϥϣⲱⲡⲉ ⲙⲡⲙⲁ ⲉⲧⲙⲙⲁⲩ ⲉϥⲡⲟⲣϣ ⲉⲃⲟⲗ ϩⲓϫⲙ ⲡϩⲟ ⲙⲡⲕⲁϩ ⲧⲏⲣϥ ⲁⲩⲱ ⲡⲙⲁ ⲛϣⲏⲛ ⲛⲁϣⲉ ⲛⲉⲛⲧⲁϥⲟⲩⲟⲙⲟⲩ ⲉⲃⲟⲗ ϩⲙ ⲡⲗⲁⲟⲥ ⲉϩⲟⲩⲉ ⲉⲛⲉⲛⲧⲁⲧⲥⲏϥⲉ ⲟⲩⲟⲙⲟⲩ ϩⲙ ⲡⲗⲁⲟⲥ ⲙⲡⲉϩⲟⲟⲩ ⲉⲧⲙⲙⲁⲩ 9ⲁⲩⲱ ⲁⲃⲉⲥⲥⲁⲗⲱⲙ ⲁϥⲉⲓ ⲉϩⲟⲩⲛ ⲉϩⲣⲁⲩ ⲛⲛⲉϩⲙϩⲁⲗ ⲛⲇ︤ⲁ︦ⲇ︥ ⲁⲃⲉⲥⲥⲁⲗⲱⲙ ⲇⲉ ⲛⲉϥⲧⲁⲗⲏⲩ ⲉⲩⲙⲁⲥⲡⲟⲣⲕ ⲁⲩⲱ ⲧⲉϥⲙⲁⲥⲡⲟⲣⲕ ⲁⲥⲡⲱⲧ ⲉϩⲟⲩⲛ ϩⲁ ⲟⲩⲕⲗⲁⲧⲟⲥ ⲛⲧⲉ ⲧⲛⲟϭ ⲛⲥⲉⲓ ⲉⲧⲣⲏⲧ ⲁⲩⲱ ⲧⲉϥⲁⲡⲉ ⲁⲥϭⲱⲗϫ ⲉϩⲟⲩⲛ ⲉⲧⲥⲉⲓ ⲉⲧⲙⲙⲁⲩ ⲁⲩⲱ ⲁϥϭⲱ ⲉϥⲁϣⲉ ⲟⲩⲇⲉ ⲧⲡⲉ ⲙⲛ ⲡⲕⲁϩ ⲁⲩⲱ ⲡⲙⲁⲥⲡⲟⲣⲕ ⲉⲧϩⲁⲣⲟϥ ⲁϥⲃⲱⲕ ⲁϥⲕⲁⲁϥ 10ⲁⲩⲣⲱⲙⲉ ⲇⲉ ⲛⲁⲩ ⲉⲣⲟϥ ⲁⲩⲱ ⲁϥⲧⲁⲙⲉⲓⲱⲁⲃ ⲉϥϫⲱ ⲙⲙⲟⲥ ϫⲉ ⲉⲓⲥ ϩⲏⲏⲧⲉ ⲁⲓⲛⲁⲩ ⲉⲁⲃⲉⲥⲥⲁⲗⲱⲙ ⲉϥⲁϣⲉ ⲉⲧⲛⲟϭ ⲛⲥⲉⲓ 11ⲁⲩⲱ ⲡⲉϫⲉⲓⲱⲁⲃ ⲙⲡⲣⲱⲙⲉ ⲡⲉⲧⲧⲁⲙⲟ ⲙⲙⲟϥ ϫⲉ ⲉⲓⲥ ϩⲏⲏⲧⲉ ⲙⲉⲛ ⲁⲕⲛⲁⲩ ⲉⲣⲟϥ ⲉⲧⲃⲉ ⲟⲩ ϭⲉ ⲙⲡⲉⲕⲣⲁϩⲧϥ ⲛⲅⲉⲛⲧϥ ⲉⲡⲕⲁϩ ⲁⲩⲱ ⲁⲛⲟⲕ ⲛⲉⲓⲛⲁϯ ⲛⲁⲕ ⲙⲙⲏⲧⲉ ⲛⲥⲁⲧⲉⲉⲣⲉ ⲛϩⲁⲧ ⲙⲛ ⲟⲩⲉⲛⲍⲱⲛⲏ ⲉⲛⲉⲥⲱⲥ 12ⲡⲣⲱⲙⲉ ⲇⲉ ⲡⲉϫⲁϥ ⲉϩⲟⲩⲛ ϩⲛ ⲓⲱⲁⲃ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ⲕⲁⲛ ⲉⲕϣⲁⲛϯ ⲉϩⲣⲁⲓ ⲉⲛⲁϭⲓϫ ⲙⲙⲏⲧⲉ ⲛϣⲉ ⲛⲥⲁⲧⲉⲉⲣⲉ ⲛϩⲁⲧ ⲛⲛⲁⲉⲛⲧⲟⲟⲧ ⲉϫⲙ ⲡϣⲏⲣⲉ ⲙⲡⲣⲣⲟ ϫⲉ ⲉⲛⲥⲱⲧⲙ ⲉⲡⲣⲣⲟ ⲉⲁϥϩⲱⲛ ⲉⲧⲟⲟⲧⲕ ⲁⲩⲱ ⲉⲧⲟⲟⲧϥ ⲛⲁⲃⲓⲥⲁ ⲁⲩⲱ ⲉⲧⲟⲟⲧϥ ⲛⲉⲑⲑⲓ ⲉϥϫⲱ ⲙⲙⲟⲥ ⲛⲏⲧⲛ ϫⲉ ϩⲁⲣⲉϩ ⲉⲡⲁϣⲏⲣⲉ ⲁⲃⲉⲥⲃⲁⲗⲱⲙ 13ⲉⲧⲉⲙⲉⲣⲛⲟⲃⲉ ⲉⲧⲉϥⲯⲩⲭⲏ ⲁⲩⲱ ⲡⲉⲓϣⲁϫⲉ ⲧⲏⲣϥ ⲛϥⲛⲁϩⲱⲡ ⲁⲛ ⲉⲡⲣⲣⲟ ϫⲉ ⲛⲧⲟⲕ ⲉⲧⲛⲁϯⲟⲩⲃⲏϥ 14ⲡⲉϫⲉⲓⲱⲁⲃ ⲛⲁϥ ϫⲉ ⲡⲉⲓϩⲱⲃ ⲁⲛⲟⲕ ϯⲛⲁⲣϣⲟⲣⲡ ⲛⲁⲁⲁϥ ⲁⲩⲱ ⲛϯⲛⲁϭⲱ ⲁⲛ ⲉⲓⲟ ⲛϭⲱⲃ ⲛⲁϩⲣⲟⲕ ⲛⲧⲉⲓϩⲉ ⲁⲩⲱ ⲓⲱⲁⲃ ⲁϥϫⲓ ⲛϣⲟⲙⲧⲉ ⲛⲥⲟⲧⲉ ⲉϩⲣⲁⲓ ⲉⲧⲟⲟⲧϥ ⲁϥⲧⲣⲧⲱⲣⲟⲩ ϩⲙ ⲡϩⲏⲧ ⲛⲁⲃⲉⲥⲥⲁⲗⲱⲙ ⲉⲧⲓ ⲉϥⲥⲟⲛϩ ϩⲙ ⲡϩⲏⲧ ⲙⲡϣⲏⲛ 15ⲁⲩⲱ ⲙⲏⲧ ⲛϩⲙϩⲁⲗ ⲉⲩϥⲓ ⲛⲛⲉⲥⲕⲉⲩⲏ ⲛⲓⲱⲁⲃ ⲁⲩⲕⲧⲟ ⲉⲁⲃⲉⲥⲥⲁⲗⲱⲙ ⲁⲩⲣⲁϩⲧϥ ⲁⲩⲙⲟⲟⲩⲧϥ 16ⲁⲩⲱ ⲓⲱⲁⲃ ⲁϥⲥⲁⲗⲡⲓⲍⲉ ϩⲛ ⲧⲥⲁⲗⲡⲓⲅⲝ ⲛⲁϣⲧⲁⲡ ⲡⲗⲁⲟⲥ ⲁϥⲟⲗϥ ⲉⲃⲟⲗ ⲁⲩⲗⲟ ⲉⲩⲡⲏⲧ ⲛⲥⲁ ⲡⲓ︤ⲏ︦ⲗ︥ ⲁⲩⲱ ⲓⲱⲁⲃ ⲛⲉϥϯⲥⲁ ⲉⲡⲗⲁⲟⲥ 17ⲁⲩⲱ ⲁϥϫⲓ ⲛⲁⲃⲉⲥⲥⲁⲗⲱⲙ ⲁⲩⲛⲟϫϥ ⲉϩⲣⲁⲓ ⲉⲩⲛⲟϭ ⲛⲟⲩⲱϣ ϩⲙ ⲡⲙⲁ ⲛϣⲏⲛ ⲉϩⲣⲁⲓ ⲉⲡⲛⲟϭ ⲛϩⲓⲉⲓⲧ ⲁⲩⲱ ⲁϥϩⲱⲣϭ ⲉϫⲱϥ ⲛⲟⲩⲛⲟϭ ⲛⲥⲟⲟⲩϩⲥ ⲛⲱⲛⲉ ⲡⲓ︤ⲏ︦ⲗ︥ ⲇⲉ ⲧⲏⲣϥ ⲡⲟⲩⲁ ⲡⲟⲩⲁ ⲁϥⲃⲱⲕ ⲉϩⲣⲁⲓ ⲉⲧⲉϥⲥⲕⲩⲛⲏ 18ⲁⲃⲉⲥⲥⲁⲗⲱⲙ ⲇⲉ ⲉⲧⲓ ⲉϥⲟⲛϩ ⲁϥⲧⲁϩⲟ ⲉⲣⲁⲧⲥ ⲛⲁϥ ⲛⲧⲉϥⲥⲧⲩⲗⲏ ϩⲙ ⲡⲉⲓⲁ ⲉϥϫⲱ ⲙⲙⲟⲥ ϫⲉ ⲧⲁⲡⲣⲣⲟ ⲁⲃⲉⲥⲥⲁⲗⲱⲙ ⲧⲉ ⲉⲃⲟⲗ ϫⲉ ⲁϥϫⲟⲟⲥ ϫⲉ ⲙⲛ ϣⲏⲣⲉ ϣⲟⲟⲡ ⲛⲁϥ ⲉⲧⲣⲉϥⲉⲣⲡⲙⲉⲉⲩⲉ ⲙⲡⲉϥⲣⲁⲛ ⲁⲩⲱ ⲁⲩⲙⲟⲩⲧⲉ ⲉⲡⲉϥⲣⲁⲛ ⲉϫⲛ ⲧⲉⲥⲧⲩⲗⲏ ⲉⲁⲩⲙⲟⲩⲧⲉ ⲉⲣⲟⲥ ϫⲉ ⲧϭⲓϫ ⲛⲁⲃⲉⲥⲥⲁⲗⲱⲙ ϣⲁ ⲉϩⲣⲁⲓ ⲉⲡⲟⲟⲩ ⲛϩⲟⲟⲩ 19ⲁⲩⲱ ⲁⲭⲓⲙⲁⲁⲥ ⲡϣⲏⲣⲉ ⲛⲥⲁⲇⲱⲕ ⲡⲉϫⲁϥ ⲛⲓⲱⲁⲃ ϫⲉ ϯⲛⲁⲡⲱⲧ ⲛⲧⲁϫⲓⲡⲟⲩⲱ ⲙⲡⲣⲣⲟ ϫⲉ ⲁⲡϫⲟⲉⲓⲥ ⲣⲡⲉϥϩⲁⲡ ⲙⲛ ⲛⲉϥϫⲁϫⲉ 20ⲡⲉϫⲉⲓⲱⲁⲃ ⲛⲁϥ ϫⲉ ⲛⲧⲕ ⲟⲩⲣⲱⲙⲉ ⲛⲧⲟⲕ ⲛϣⲟⲩⲡⲉⲓⲟⲩⲱ ⲕⲁⲧⲁ ⲡⲟⲟⲩ ⲛϩⲟⲟⲩ ⲉⲕⲉϫⲓⲟⲩⲱ ⲇⲉ ϩⲛ ⲕⲉϩⲟⲟⲩ ϩⲙ ⲡⲟⲟⲩ ⲇⲉ ⲛϩⲟⲟⲩ ⲛⲅⲛⲁϣⲃⲱⲕ ⲁⲛ ⲙⲛ ⲡⲉⲓⲟⲩⲱ ϫⲉ ⲁⲡϣⲏⲣⲉ ⲙⲡⲣⲣⲟ ⲙⲟⲩ 21ⲡⲉϫⲉⲓⲱⲁⲃ ⲛⲭⲟⲩⲥⲓ ϫⲉ ⲡⲱⲧ ⲛⲅⲧⲁⲙⲉⲡⲣⲣⲟ ⲉⲛⲉⲛⲧⲁⲕⲛⲁⲩ ⲉⲣⲟⲟⲩ ⲁⲩⲱ ⲭⲟⲩⲥⲓ ⲁϥⲡⲁϩⲧϥ ⲁϥⲟⲩⲱϣⲧ ⲛⲓⲱⲁⲃ ⲁϥⲉⲓ ⲉⲃⲟⲗ ϩⲓⲧⲟⲟⲧϥ 22ⲁⲭⲓⲙⲁⲁⲥ ⲇⲉ ⲡϣⲏⲣⲉ ⲛⲥⲁⲇⲱⲕ ⲁϥⲟⲩⲱϣⲃ ⲉϥϫⲱ ⲙⲙⲟⲥ ⲛⲓⲱⲁⲃ ϫⲉ ⲕⲁⲁⲧ ⲛⲧⲁⲡⲱⲧ ϩⲱ ⲙⲛ ⲭⲟⲩⲥⲓ ⲡⲉϫⲉⲓⲱⲁⲃ ⲛⲁϥ ϫⲉ ⲉⲧⲃⲉ ⲟⲩ ⲛⲧⲟⲕ ⲉⲕⲛⲁⲡⲱⲧ ⲧⲉⲛⲟⲩ ⲡⲁϣⲏⲣⲉ ⲁⲙⲟⲩ ϭⲱ ϫⲉ ⲛⲧⲕ ⲟⲩϣⲟⲩⲡⲱⲧ ⲁⲛ ⲉϫⲓⲡⲉⲓⲟⲩⲱ ⲛⲟⲩϩⲏⲩ ⲛⲁⲕ ⲁⲛ ⲡⲉ 23ⲡⲉϫⲉⲁⲭⲓⲙⲁⲁⲥ ⲛⲁϥ ϫⲉ ⲟⲩ ⲡⲉⲧϣⲟⲟⲡ ϭⲉ ⲉⲓϣⲁⲛⲡⲱⲧ ϩⲱ ⲡⲉϫⲉⲓⲱⲁⲃ ⲛⲁϥ ϫⲉ ⲉⲓⲉϩⲉ ⲡⲱⲧ ⲁⲩⲱ ⲁⲭⲓⲙⲁⲁⲥ ⲁϥⲡⲱⲧ ϩⲛ ⲧⲉϩⲓⲏ ⲛⲕⲉⲭⲁⲣ ⲁϥⲣϩⲓϩⲏ ⲛⲭⲟⲩⲥⲓ 24ⲇ︤ⲁ︦ⲇ︥ ⲇⲉ ⲛⲉϥϩⲙⲟⲟⲥ ϩⲛ ⲧⲙⲏⲧⲉ ⲛⲧⲡⲩⲗⲏ ⲥⲛⲧⲉ ⲁⲩⲱ ⲡⲉⲥⲕⲟⲡⲟⲥ ⲁϥⲃⲱⲕ ⲉϩⲣⲁⲓ ⲉⲡⲉⲧⲡⲉ ⲛⲧⲡⲩⲗⲏ ⲥⲛⲧⲉ ϩⲁϩⲧⲙ ⲡⲉⲥⲧⲉⲓⲭⲟⲥ ⲁⲩⲱ ⲁϥϥⲓⲁⲧϥ ⲉϩⲣⲁⲓ ⲁϥⲛⲁⲩ ⲁⲩⲱ ⲉⲓⲥ ⲟⲩⲣⲱⲙⲉ ⲉϥⲡⲏⲧ ⲟⲩⲁⲁϥ ⲉϥⲙⲟⲟϣⲉ ⲉⲣⲟϥ 25ⲡⲉⲥⲕⲟⲡⲟⲥ ⲇⲉ ⲁϥⲱϣ ⲉⲃⲟⲗ ⲁϥⲧⲁⲙⲉⲡⲣⲣⲟ ⲉϥϫⲱ ⲙⲙⲟⲥ ϫⲉ ⲟⲩⲣⲱⲙⲉ ⲡⲉ ⲙⲁⲩⲁⲁϥ ⲁⲩⲱ ⲡⲣⲣⲟ ⲡⲉϫⲁϥ ϫⲉ ⲉϣϫⲉ ⲟⲩⲣⲱⲙⲉ ⲛⲟⲩⲱⲧ ⲡⲉ ⲟⲩⲛⲟⲩⲱ ϩⲛ ⲧⲉϥⲧⲁⲡⲣⲟ ϩⲛ ⲟⲩⲡⲱⲧ ⲇⲉ ⲛⲉϥⲡⲏⲧ ⲉϩⲟⲩⲛ ⲉⲣⲟⲟⲩ 26ⲁⲩⲱ ⲡⲉⲥⲕⲟⲡⲟⲥ ⲁϥⲛⲁⲩ ⲉⲕⲉⲣⲱⲙⲉ ⲉϥⲡⲏⲧ ⲁⲩⲱ ⲡⲉⲥⲕⲟⲡⲟⲥ ⲁϥⲱϣ ⲉⲃⲟⲗ ϩⲓϫⲛ ⲧⲡⲩⲗⲏ ⲉϥϫⲱ ⲙⲙⲟⲥ ϫⲉ ⲉⲓⲥ ⲕⲉⲣⲱⲙⲉ ⲉϥⲡⲏⲧ ⲟⲩⲁⲁϥ ⲡⲉϫⲉⲡⲣⲣⲟ ϫⲉ ⲡⲉⲓⲕⲏⲧ ⲉϥⲛⲏⲩ ⲉϫⲓ ⲟⲩⲱ 27ⲡⲉⲥⲕⲟⲡⲟⲥ ⲇⲉ ⲡⲉϫⲁϥ ϫⲉ ϯⲛⲁⲩ ⲁⲛⲟⲕ ⲉⲧϭⲓⲛⲡⲱⲧ ⲙⲡϣⲟⲣⲡ ⲉⲥⲟ ⲛⲑⲉ ⲛⲧϭⲓⲛⲡⲱⲧ ⲛⲁⲭⲓⲙⲁⲁⲥ ⲡϣⲏⲣⲉ ⲛⲥⲁⲇⲱⲕ ⲡⲉϫⲉⲡⲣⲣⲟ ϫⲉ ⲟⲩⲣⲱⲙⲉ ⲉⲛⲁⲛⲟⲩϥ ⲡⲉ ⲡⲁⲓ ⲁⲩⲱ ϥⲛⲁⲉⲓ ⲙⲛ ⲟⲩⲱ ⲉⲛⲁⲛⲟⲩϥ 28ⲁⲩⲱ ⲁⲭⲓⲙⲁⲁⲥ ⲁϥⲱϣ ⲉⲃⲟⲗ ⲉϥϫⲱ ⲙⲙⲟⲥ ⲉϩⲟⲩⲛ ϩⲙ ⲡⲣⲣⲟ ϫⲉ ϯⲣⲏⲛⲏ ⲁⲩⲱ ⲁϥⲡⲁϩⲧϥ ⲉⲡⲕⲁϩ ϩⲓⲑⲏ ⲙⲡⲣⲣⲟ ⲁϥⲟⲩⲱϣⲧ ⲉϥϫⲱ ⲙⲙⲟⲥ ϫⲉ ϥⲥⲙⲁⲙⲁⲁⲧ ⲛϭⲓ ⲡϫⲟⲉⲓⲥ ⲡⲉⲕⲛⲟⲩⲧⲉ ⲡⲁⲓ ⲛⲧⲁϥⲱⲣϥ ⲉϩⲟⲩⲛ ⲛⲛⲣⲱⲙⲉ ⲉⲧⲙⲟⲥⲧⲉ ⲛⲉⲛ ⲧⲉⲩϭⲓϫ ⲉϫⲙ ⲡⲁϫⲟⲉⲓⲥ ⲡⲣⲣⲟ 29ⲛⲧⲉⲩⲛⲟⲩ ⲇⲉ ⲡⲣⲣⲟ ⲡⲉϫⲁϥ ϫⲉ ϯⲣⲏⲛⲏ ⲙⲡⲁϣⲏⲣⲉ ⲁⲃⲉⲥⲥⲁⲗⲱⲙ ⲡⲉϫⲉⲁⲭⲓⲙⲁⲁⲥ ϫⲉ ⲁⲓⲛⲁⲩ ⲉⲡⲙⲏⲏϣⲉ ⲧⲏⲣϥ ⲉⲩⲉⲩⲫⲣⲁⲛⲉ ϩⲙ ⲡⲧⲣⲉⲓⲱⲁⲃ ⲡϩⲙϩⲁⲗ ⲙⲡⲣⲣⲟ ϫⲉⲩⲡⲉⲕϩⲙϩⲁⲗ ⲉⲃⲟⲗ ⲉⲧⲉⲁⲛⲟⲕ ⲡⲉ ⲁⲩⲱ ⲙⲡⲓⲉⲓⲙⲉ ϫⲉ ⲟⲩⲛ ⲡⲉ ⲡϩⲱⲃ ⲛⲧⲁϥϣⲱⲡⲉ ⲙⲙⲟϥ 30ⲡⲉϫⲉⲡⲣⲣⲟ ⲛⲁϥ ϫⲉ ⲁⲙⲟⲩ ⲛⲧⲟⲟⲩⲛ ⲛⲅⲁϩⲉⲣⲁⲧⲕ ⲙⲡⲉⲓⲙⲁ ⲁϥⲃⲱⲕ ⲇⲉ ⲁϥⲁϩⲉⲣⲁⲧϥ 31ⲁⲩⲱ ⲉⲓⲥ ⲭⲟⲩⲥⲓ ϩⲱⲱϥ ⲁϥⲉⲓ ⲡⲉϫⲁϥ ϩⲓⲑⲏ ⲙⲡⲣⲣⲟ ϫⲉ ⲙⲁⲣⲉⲡⲁϫⲟⲉⲓⲥ ⲡⲣⲣⲟ ⲥⲱⲧⲙ ⲉⲡϣⲉⲛⲟⲩⲃⲉ ϫⲉ ⲁⲡϫⲟⲉⲓⲥ ⲣⲡⲉⲕϩⲁⲡ ⲙⲡⲟⲟⲩ ⲉⲃⲟⲗ ϩⲛ ⲛⲉⲧⲧⲱⲟⲩⲛ ⲧⲏⲣⲟⲩ ⲉϩⲣⲁⲓ ⲉϫⲱⲕ 32ⲡⲉϫⲉⲡⲣⲣⲟ ⲉϩⲟⲩⲛ ϩⲛ ⲭⲟⲩⲥⲓ ϫⲉ ϯⲣⲏⲛⲏ ϣⲟⲟⲡ ⲙⲡⲁϣⲏⲣⲉ ⲁⲃⲉⲥⲥⲁⲗⲱⲙ ⲡⲉϫⲉⲭⲟⲩⲥⲓ ϩⲓⲑⲏ ⲙⲡⲣⲣⲟ ϫⲉ ⲛⲉϫⲁϫⲉ ⲙⲡⲁϫⲟⲉⲓⲥ ⲡⲣⲣⲟ ⲉⲩⲉⲉⲣⲑⲉ ⲙⲡϣⲏⲣⲉ ⲉⲧⲙⲙⲁⲩ ⲁⲩⲱ ⲟⲩⲟⲛ ⲛⲓⲙ ⲛⲧⲁⲩⲧⲱⲟⲩⲛ ⲉϫⲱⲕ ⲉϩⲛⲡⲉⲑⲟⲟⲩ ⲉⲣⲟⲕ 33
Copyright information for
CopSahBible2